Malmesbury, Moorreesburg, Piketberg, Eendekuil, Citrusdal, Riebeek , Kasteel, Riebeek Wes, Wellington

Voorsitter:  Kobus van Niekerk

Wes-Boland Tak is gesetel op Moorreesburg en staan onder leiding van Kobus van Niekerk. Kobus is sekerlik die mees geskikste kandidaat vir die posisie, want wie is beter toegerus as ‘n man wat reeds sedert sy geboorte ‘n hegte verbintenis met hierdie dorp en sy mense het? Kobus is op Moorreesburg gebore, het hier skoolgegaan en het vir meer as 30 jaar die plaaslike landbougemeenskap gedien.  

Hy het sy loopbaan in 1988 by Moorreesburg se Koringboere Koöp begin en na 34 jaar afgetree, as Graanbestuurder by Overberg Agri.  

 Kobus se grondslag as jagter en sportskut, het reeds voor skool begin. Sy oupa was ‘n Karoo-boer, en hier is hy aan jag blootgestel van kindsbeen af. Sy pa was, onder andere, die kwartiermeester van die plaaslike kommando gewees en Kobus is gevolglik vroeg blootgestel aan skiet saam met die kommando-lede. Wyle Oom Dolf Visser, voormalige Voorsitter en stigterslid van Wes-Boland Tak, sou Kobus vanaf 2005 verder begelei na Kaapjag en sy dienste.

Kobus as gesinsmens, hou ook van kampeer, herlaai en houtwerk en is op sy gelukkigste wanneer hy sy twee dogters en die jeug in die algemeen, kan blootstel aan jag en skiet. Kobus is die ideale kandidaat om die lede van Wes-Boland Tak te dien en daarom is dit nie ‘n verrassing dat hy tans hierdie amp vervul nie.

Waarna lede kan uitsien

Wes-Boland Tak is 18 Oktober 1999 gestig, as een van die eerste takke van Kaapjag, met 47 lede. Die tak het sedertdien, onder bekwame leiding gegroei tot tien maal die aanvanklike nederige begin. Wes-Boland Tak is gedurende 2018 as die Kaapjag Tak van die Jaar aangewys en is een van die mees aktiewe takke wat lede aktiwiteite betref.

Hierdie tak bied die volledige reeks dissiplines aan, wat die lede benodig vir instandhouding van hulle toegewyde jag- en sportskietstatusse. Die fokus is nie alleenlik op formele dissiplines nie, maar ruimte word ook geskep vir pretskiete en informele deelname.  Wes-Boland Tak beskik oor sy eie klubhuis en 500m skietbaan.
‍

Besoek gerus ook hierdie tak se eie onafhanklike platforms:

⨠ Webtuiste: www.wesbolandjag.co.za 

⨠ Instagram: www.instagram.com/wesbolandjag 
 

Besoek gerus ons kalender om hierdie tak se komende skietgeleenthede te besigtig (2022 skop met 'n Vlakteskiet op 12 Februarie 2022 af).

Lidmaatskap 

Indien u in die omgewings van Malmesbury, Moorreesburg, Piketberg, Eendekuil, Citrusdal, Riebeek Kasteel, Riebeek Wes of Wellington woonagtig is, sal u outomaties met die Wes-Boland Tak verbind word ten tye van u suksesvolle lidmaatskapaansoek.