Ceres, PA Hamlet, Op-die-Berg, Wolseley, Tulbach, Gouda

Voorsitter: Jacques Visser  

Jacques het op ‘n wingerdplaas naby Stellenbosch groot geword en is aan jag deur sy pa bekendgestel waar hy as tjokkertjie hom vergesel het op jagte na die destydse Suid-Wes Afrika.
 
Nadat hy sy skoolloopbaan by Paul Roos Gimnasium en sy studies in BSc Landbou voltooi het, het hy homself tot ‘n toekoms in vrugteverbouing verbind. Hy het as jong man en pas gegradueerde 'n betrekking naby Ceres aanvaar en sedertdien hierdie omgewing sy tuiste gemaak.  

Hy is tans ‘n  Mentor by Crispy Fruit (deel van die Du Toit-groep). Jacques is ‘n besige man, maar maak tog tyd om die Kaapjag lede en sy gemeenskap in hierdie streek te dien. Vanaf November tot Mei-maand is oestyd in hierdie wêreld en dan is daar min tyd vir stokperdjies. Met die aanbreek van winter, kan Jacques egter bietjie asem skep en dan sorg hy dat sy jaarlikse jag in Namibië, so rustig en tradisioneel as moontlik is. Hy het ook ‘n passie vir bewaringsjag en het al meeste spesies gejag. Sy droom is om nog rietbok en bosbok te jag. Hy herlaai sy eie patrone en hy put ook groot genot uit die blootstelling van jongmense tot jag en skiet.


Sy 21 jarige dogter is ‘n kranige jagter en doen dit met haar eie roer. Jacques se droom vir Kaapjag is om wesenlike groei van die vereniging onder die jongmense te bewerkstellig. Jacques en sy toegewyde en  bekwame span staan slaggereed om jongmense by Witzenberg Tak te verwelkom. 

Waarna lede kan uitsien

Witzenberg Tak is die jongste van Kaapjag se takke en bedien die dorpe van Ceres, PA Hamlet, Op-die-Berg, Wolseley, Tulbach en Gouda. Hierdie tak beskik oor twee uitstekende skietbane om die lede naby Ceres en in die Koue Bokkeveld te bedien.

Vir die gerief van die lede, is die Boetie Beef-skietbaan net buite Ceres op die pad na Touwsrivier geleë. Die Klaas Fernhout-skietbaan lê naby Op-die-Berg in die Koue Bokkeveld.

‍Jaarlikse Veldskiet

 Witzenberg Tak is bekend vir sy jaarlikse Witzenberg Veldskiet wat gewoonlik vroeg in die jaar aangebied word. Hierdie byeenkoms wat op die prentjie mooi plaas, Lakenvlei  (Ceres) aangebied word, trek skuts van regoor die Wes-Kaap en is werklik ‘n prestige byeenkoms met aanloklike pryse.

‍‍‍

Hierdie byeenkoms is vanjaar vir die 17de keer aangebied op 3 Februarie 2024. Dit was werklik 'n spoggeleentheid en beslis die moeite werd om by te woon.

Besoek gerus ons kalender vir nadere besonderede oor hierdie tak se komende skietgeleenthede. Witzenberg-aktiwiteite word volgens die skietbaan waar dit aangebied word gelys op ons webtuiste, so kyk ook uit vir die Koue Bokkeveld-byeenkomste. ‘n Besoek aan die manne van die Koue Bokkeveld en die Klaas Fernhout-skietbaan word ten sterkste aanbeveel.

‍

Lidmaatskap

Indien u in die omgewings van Ceres, PA Hamlet, Op-die-Berg, Wolseley, Tulbach en Gouda woonagtig is, sal u outomaties met die Witzenberg-tak verbind word ten tye van u suksesvolle lidmaatskapaansoek.

‍